Massangüéta:
Wissûmatê I bianéwénamú indî wissaki na nukî I fésséména wana wakî áwá na Yafiya, na maná râ massa mà andjara ámá nukî nú timbamú na makachi, tï wǎ indî wá tsaka wukuku râ wênô râ andjara na wupesseta râ wakōkongô na ngüéninô râ wakî.
Nǎn wu ukachi na mbéya 2011 pôt 2015, wa nú timbānamú na mukuânô indî wa bungana makana wa fitimú uffenda turrû tá andjara ámá wa barrumamú námá. Nǎn wu wa fumanú na madjêrtênê ámá wa yānamú uwanda uffuffuna andjara rabú, makana wa yānamú ussôssô indî wa güirimiya párá râ nukî. Kú wa bungamú imuênê I yānamú ukachi na wamuênê-matê na wuchiô râ wamuênê-matê indî wa fiti wombāna na utsakeya ngüîdjiménô râ adôngô na tumu pandú na matiôr mïmá. Awô wú Wissûmatê A bianéwénamú kú A nú téréménamú na wuchiô râ mbêndô wuchí upwêpwê râ uffîrô râ mbéya 2016.
Upwê:
Upwê râ Wissûmatê I mú mawanda má wutimbāna, wubārï, wussafia, wutifiya râ tumu na wukirichia râ utênê râ andjara râ wakî.
Mbunganô:
Wissûmatê I mú tunu mbunganô azê I gumiyamú ngaworénô muka makana urrongo azê I bionomú nuffuï, nguru na manônō ná wussafia râ pandú râ assôtô indî nambari A nyêmê utumba wuchí’uwu. Arï bondiénô râ mutu I kachimú na umuênê-matê na wuchiô râ umuênê-matê.
Yenga:
Yenga râ Wissûmatê I sangüetamú udjï wutimbāna na wugüirimiya râ nukî, andjara énari makana urrôngô râ wipêssê ukú ngüîma izí I udjamú makana umbuta râ watu umô I énamú tô I wôrrômú tsi na mana, I zu wa aka ussaki, ubari na utsakeya râ itsi rabú râ ngüidjiménô na akêrê pandú na matiôr mïmá.
Yenga râ Wissûmatê I buandanamú na :
- Uffôna, wombāna na uwongo râ wipêssê,
- Uffôna, wombāna, uwongo na utirimiya râ andjôdjônô, ibinô na inúnú râ waki,
- Utsakeya râ witsongô ukú ngüîma na nukî,
- Wuffuffüiya, matimissia na wuraria râ watu na nukî,
- Wutirimiya râ
- Wissaki,
- Uyêkê râ inguru râ ibinô, wunôba râ tamba na wiwôrrô,
- Uyêkê râ wukēkêrê,
- Matsaka na andjôdjônô,
- Wukumba na wuguchia râ witsongô ukú ngüîma na nukî,
- Mawanda má wutimbāna na wugumiya râ uwôngô râ tudjú na nukî;
Ngüéngüînô râ manônō:
Wissûmatê A nônōmú na yaka râ mutu ngüîma, mangazú tô ugunú, yedja tô pêpêyô, ungüima A timba mā pêyô na ngüidjiménô azê A fitimú utsakeya na utangüiana na wa sōh.
Na wuchiô wa imuênê wu Wissûmatê A tà tirimiya wendana na widôngô râ wakî íwí na Yafiya, Bokito, Mbangassina, Ntui, Ngoro, pandú ngüîma na itindikana yïma arï I fitimú awéngüéwinam indî A bāchi na A ratia yaka yïma.
Yenga:
- Wuguchia râ utênê râ mbéya 2016;
- Matsakeya mà Pêndê 2016/007 râ wuchí 12 râ mabôwâ, mbeya 2016 na wubari râ utênê na ukutu, nuyumú na mangazú;
- Matsakeya iffundû (Tsuchimî, mukî, wakōkongô);
- Wuguchia wa mutsôngô na nutu râ mutu;
- Wukumba râ wikata râ wiffêkêrê, mî na wiffuênê wiraringa;
- Wutirimiya râ iyêkê râ ibinô, na matimissia;
- Wutirimiya râ « Mabussa mà tumu », issassaka râ tumu na uffê râ Yǎndû na Lycée Classique et Moderne de Bafia, nātê râ Pachi râ Yaka râ Tsingïma-Kamerun 2016.
Maffeya:
Bênêbê :
- Wututa râ mutêtê mutānú râ pwamaka râ wipêssê
- Wuguchia râ utênê râ mbéya 2018,
- Wubāchi na wuteka râ ingurû râ ibînô azêmô.
Namatō :
- Wuguchia mbǎmbà râ ibāwipêssê râ tôkô yôbôt râ wipêssê na mutsongô na wutimbāna na ngüidjiménô na wuffuffuna râ andjara na tumu râ wakî na wudjú râ wakî.
Wissûmatê 